2016年7月27日 星期三

奇怪的市況

小女子暑期放假時間係逢星期三同日,今日得閒,就寫下我最近嘅"唔得閒睇市投資回顧"啦。

本來喺低位入嘅互太,至今已經升了2成,可惜我賣了大半,但怕倉位太重唔安心都無法子,惟有諗啲錢唔係我賺架啦。

好彩小女子脫歐時入貨,同埋怕死無買炒味濃嘅股,主要以收息為目的,所以基本個組合都算升得穩陣,暫時無伏。惟一跌嘅係大唐發電,除咗淨之後完全升唔起,但跌極都係除完淨嘅價。我諗係因為佢始終派息記錄穩定,跌到某個最低位會有支持,所以呢隻貨今年連股息應該只係平手,下年先會有正進賬了。

雖然有人話係牛一開始,但升嘅只係一線同二線頭股,殘價嘅繼續殘,例如必瘦站。但我咁低位買都無蝕,佢只係唔升,不過唔緊要,我當收息都好安心,因為佢已經殘中帶穩。小女子選股都會望下佢歷年派息穩唔穩定,如果穩定的話,只要唔係高價入貨,價位一般都會有支持。所以呢個組合都算係我當初嘅本意,唔使下下睇住個市。

對於現在奇怪嘅市況,最後送上一篇文章比大家睇下,我覺得佢寫得幾啱。


【異動尋寶】市升咁耐仲係「滿倉踏空」?關鍵係…(魏力)
如今閣下遇到的,是一個非典型升市,你同我都未曾遇過,亦無先例可循。要食好呢一個浪,首先要 unlearn你一路用開嗰套,甚麼升龍頭就追二三線、升到尾細價股一定禾雀亂飛、炒完新能源汽車就炒風電光伏等等,當粉筆字咁抹咗佢,與時並進,再用以前嗰套?今次九成輸死。
回報要求降 引爆升市
呢排不少戰友向筆者大呻:點解今次個市係咁升,但自己個倉就無乜受惠,甚至「滿倉踏空」,有無咁難玩呀?無錯,正因為今次係非典型升市!起因,係英國脫歐公投成真,唔少基金之前買重留歐,今次揩咗嘢,唔死頂上去點甩身?但硬頂唔係辦法,點都要搵藉口引人加入「搶包山」,而藉口就係美國下半年唔會加息,或最多加一次,低息環境持續下,回報要求就要「將就吓」,以前高息股要 7厘先收貨,家陣4厘都照殺,一隻高息股由7厘炒至4厘息,可以製造幾大上升空間?舉個例:以前股價10蚊,股息率7厘,依家4厘都ok,理論價可炒到17.5元,潛在升幅已經係75%!回報要求急降,係今次升市的大邏輯,同盈利增長、估值低迷關係不大。
去年中以來,黑天鵝周街飛,散戶一係成手蟹貨無力參戰,一係睇支爆、睇債爆,總之堅定睇淡,點都唔入市,所以筆者估計,就算個市彈到呢個位,散戶的參與度並不高,有都係打吓格仔,做吓即日鮮就算。咁大戶就唔驚黑天鵝?非也,但投行、券商要幫人投資,點都要向客戶交功課,只好硬著頭皮焗砌。基金掃貨一定要流動性高、深度夠,市值有番咁上下,所以你會見今次炒來炒去都係藍籌、大價基金股,昨日資金轉追濠賭股,就輪到騰訊( 700)、滙控(005)回氣,回一輪再衝過,成個pattern就係咁去。換著平時見騰訊炒走去買金山軟件(3888)?輸死都似。
北水受阻 三四線股頹
指數股一條氣炒上去,值得逢回吐吸納,但三四線股就係兩個世界,因為呢類龍尾股多數由中資睇場,舊年大時代,北水炒到飛沙劈石,但為減低走資及人仔貶值壓力,阿爺已將地下錢莊封得八八九九,連來港買保險都有限制,可見北海南下除經港股通額度外,所餘方法已無多,港股通可買賣股份,咪又係滙控、騰訊、內銀?結果係大價股旺完又旺,三四線股頹極都有,除個別半新股可以炒貨乾,其他普遍炒一兩日就打道回府,氣勢難成,鑊氣自然不足。
講咗咁耐,戰友們應已明白,今次主戰場係大價股、基金股,吉利( 175)、舜宇光學(2382)、騰訊(700)、金沙(1928)等應是逢調整吸納。兩周前推介的天虹紡織(2678),出完盈喜後已由8蚊炒到10蚊,昨日見大行牌仲係咁搶,似乎仲有一大段路可走。中海物業(2669)盈喜後也是搶到傻,但9RSI已見89非常超賣,可候回至1.5元吸納。





2 則留言:

  1. grace表面上是投資新人, 其實講心態, 已經高班過不少人. (我係講真既)

    回覆刪除
    回覆
    1. 多謝你。我的心態是平靜安穩,唔求暴發,只求努力過後稍有餘便可以了。

      刪除