2016年12月1日 星期四

暢所欲言

呢度應該無咩人識我真身,就放肆講下一啲比較敏感嘅話題吧。

如果大家有睇開我寫嘅無聊嘢,應該睇到我之前諗轉唔轉工苦苦掙扎咗好耐。呢一刻諗如果無咩變卦,我應該會喺度做到退休了(我上司曾經表示過呢種諗法)。

事緣教育行業,對年青老師而言每年都洗牌一次。上到岸搵到永久教席,又食得鹹魚頂得順啲工作量嘅,固然恭喜佢步步高陞。但仍然有為數不少的年青教師,係年年大執位的,今年有工開唔保證下年有。今年市道好差,我識三個教中文,一個學歷最好三大畢業,人亦可靠,但今年只搵到第三組別學校合約位。我對第三組別學校無歧視,有時候呢班學生比成績好嘅學生更重感情。我想指出嘅係呢種條件稍有經驗嘅年青教師都只搵到第三組別學校教席,其他學歷無咁標青而未上岸嘅年青教師,搵唔到合約教多年就好普遍,另外有兩個就係咁,教咗幾年今年搵唔到合約教席。有時打一份工需要成就感,唔一定係教出成績好嘅學生,而係長年喺一個教學環境扎根,學生對你嘅一份信任。但年年合約嘅工作,叫年輕教師能在何處落葉歸根?

望返轉頭,我慶幸自己選擇一世發唔到達但平穩。上司信任我,學生對我好,睇少幾次人事心病身體勞累而要睇嘅醫生。工作穩定,雖然知自己住唔到靚樓,但舊的小小安樂窩都有預算供得起。回望有同期畢業學校教師勞心到法令紋都出哂,好慶幸自己仲未有呢種皺紋,真係多多錢都救唔返呢種老態。

另外,最近都有諗自己係咪咁耐都未定落嚟搵個人嫁,係咪好任性,同埋無哂籌碼。但最近見到有個大我學生十幾年嘅男人似係對我學生有意思,見到佢哋相處時個女仔有啲小妹妹脾氣,個男人處處遷就。雖然一個願打一個願熬,佢哋可能好享受,旁人無從置喙,但由此諗諗下我嘅成熟肯就人,同人相處令人舒服係經驗,亦係成熟女子嘅另一賣點,無庸妄自菲薄,哈哈。

10 則留言:

  1. 工作上有好的上司很幸福,簡簡單單,開開心心 :D

    回覆刪除
  2. 現實中都無咩人知我有打blog,所以可以o係blog入面講咩都得。

    回覆刪除
    回覆
    1. 認同,無人識自己可以放肆啲 ^^

      刪除
  3. 澳門情況都唔樂觀,由其係教中文,已經氾濫左好耐。
    拍拖嫁人依家野,隨緣啦。

    回覆刪除
  4. 其實行行都係咁,年輕嗰浸機會少咗係普遍現象。不過都唔係絕對嘅,總有人搵到教席或長工,問題係為何這個不是我啫。

    回覆刪除
    回覆
    1. 總有人,不過機會渺茫,亦好講際遇
      那些朋友都有努力,但一年保唔到一年
      不得不承認,留得住的有佢獨有的技能:
      一係能力好一係好識擦鞋
      一係好有運氣

      我係個普通人,所以不是我

      刪除
    2. 依家教育制度咁功利化,實在好恐怖,咁從而會影響教育質數

      刪除
  5. 現實始終是現實,每年畢業生唔少,但教席(感覺上)沒有增加,年輕新入行機會自然少咗。

    回覆刪除