2018年8月6日 星期一

我回來了

好耐無返嚟喇,以後會喺度寫返多啲嘢,因為我已經卸載了fb,唔知幾時先會再安裝返個app。
其實本來已經睇少咗fb,因為感覺睇太多人哋嘅財富,感覺自卑同唔開心。最近因為發表咗對家境富有,因為其他人嘅評論而自殺嘅人感到不解。呢種人一般有才華,心思細膩,比較完美主義。但窮人因為將心思放喺搵食上,所以一般唔會只集中心思喺其他人對佢嘅評價之上,難啲諗埋一邊。而窮人比較有抗逆力,始終面對過嘅困難真係多。有比較敏感嘅fb fd唔同意,就同我講咗好耐。始終我做咗咁多年人,有自己睇法係正常,我講過話會睇下資料了解下,但佢無放過我,講到我嘅睇法會推佢去死咁,所以我都唔想再同佢拗。只能說我係個唔細膩敏感嘅人,好難同脆弱嘅人相處。諗諗下,都係唔好返女人堆做嘢了,好煩。
都好嘅,順便刪埋fb,因利乘便喇。
講返投資,一注獨買嘅股票,收益回撤了六成。有人問點解唔一早放,但人嘅心就係一升就會覺得佢繼續升,跌又唔甘心放,而且佢係間好公司,年年賺錢,有成十厘息(雖然跌咗好多年息,悲),加上套返舊錢都唔夠首期,所以而家都無謂割肉,繼續擺下喇。有息收嘅股票尚且可守,無息就難啲安心。
希望人民幣唔好再貶值,否則真係後果堪虞。
好喇,落車了,要返工,遲啲再寫。

8 則留言:

  1. 唔同人有唔同意見好正常~何必一定要說服人呢~哈哈

    回覆刪除
    回覆
    1. 係啊,所以唔想同佢哋糾纏了,反正大家都改變唔到大家

      刪除
  2. 少年時在意人地既睇法,所以成日唔開心~
    長大了,知道自己係咩人,喜歡做咩事,人地既睇法就變得無關痛癢。
    呢個世界,無論你點傳播自己既想法,或者說服人,永遠都有同你持不同意見既人,口痕講兩句就算,繼續討論係浪費時間 :)

    回覆刪除
    回覆
    1. 係,倒不如好好花心思充實自己,做自己開心嘅事。
      其實無論做咩事,都有人贊成或反對,無謂說服人支持自己,行自己嘅路好了。

      刪除
  3. 呢個世界有73億人,點理得哂?人地講乜真係唔太洗理,生活是自己的,加油。

    回覆刪除
  4. 人比人,比死人, 其實o係香港已經好幸福,所謂既窮都重有iphone用,可以食好西,照去日本旅行, 看開點吧!

    回覆刪除
    回覆
    1. 係嘅,我自己都成日同人比較,覺得自己人工無人哋咁高。不過講兩句就算,人生都係咁過,哈哈。

      刪除